Ávarp fjallkonu 2020

Hátíðarhöldin á þjóðhátíðardeginum í ár voru að mörgu leyti með óvenjulegu sniði eins og svo margt annað á þessu Covid ári. Ávarp fjallkonunnar var þó á sínum stað og að þessu sinni var það skáldið Þórdís Gísladóttir sem orti ljóðið. Edda Björgvinsdóttir leikkona flutti það á Austurvelli samkvæmt hefðinni.

Veðrið var dásamlegt og það var því samhljómur með umhverfinu, ljóðinu og fallegum flutningi Eddu. Hér fyrir neðan má lesa ávarp fjallkonu 2020 og á vef 17. júní má sjá skáld og fjallkonur fyrri ára og lesa ávörpin frá og með 2004. 

Ávarp fjallkonu

honum lauk
þessum vetri
sem sífellt minnti á sig
og færði okkur
óveður
snjóflóð
jarðskjálfta
farsótt

hann er liðinn
þessi vetur
sem neyddi okkur til að rifja upp gömul orð
sóttkví
samkomubann
píningsvetur
sóttarvetur
lurkur

það kom vor
með sólgullin lauf
himinblátt haf
og farfuglasöng

nú er sumar
við getum ferðast
um stræti
garða
urðir
móa
undir hverflyndum skýjum
í sólskini
þoku
regni

við skulum hugsa hvert um annað
við skulum njóta bjartra dægra
við skulum rækta garðinn okkar

Þórdís Gísladóttir